Ginbawian sang kabuhi ang isa ka drug personality matapos ini ginluthang sang wala pa makilal-an nga riding-in-tandem sa Sumakwel, Barangay 2, siudad sang San Carlos, Negros Occidental, takna las 9:45 sang gab-i, Miyerkules, Oktubre 18, 2023.
Ginkilala ang biktima kay Fritz Gerald Tomarong Cantero alyas ‘Pra-Pra’, wala sang trabaho kag residente sang nasambit nga lugar.
Base sa report sang San Carlos City Police Station nga samtang naga-standby si Cantero sa higad sang karsada, hinali na lamang nag-ulhot ang duha ka lalaki nga nakasuksok sang hoody jacket nga sakay sang motorsiklo kag ginluthang sang makapila nga beses ang biktima.
Gindala ang biktima sa San Carlos City Hospital apang gindeklarar ini nga dead-on-arrival sang attending physician.
Narekober sa ginluntaran sang insidente ang anom ka bilog nga basiyo sang armas-luthang nga calibre 45.
Nahibaluan nga si Cantero ang isa ka drug personality kag naka-agi na ini nga magpaidalom sa probation.
Nagapatigayon karon sang imbestigasyon ang San Carlos CPS agud matumod ang identity sang mga supetsado kag ang ila motibo sa pagpangluthang sa biktima.*