Pagatun-an na sa Pilipinas ang pagpaidalum sa COVID vaccination sang mga kabataan nga naga edad lima ka tuig paidalum.
Suno kay Myrna Cabotaje, chairperson sang National Vaccination Operations Center, magadepende sa resulta sang mga pagtuon sa abroad ang mangin desisyon sang pungsod, kon bala ipaidalum sa COVID vaccination ang mga kabataan sa nasambit nga “age group”.
Base sa report, ginsugdan na ang vaccination sa mga kabataan sa Amerika nga naga edad pa lamang sang anum ka bulan.
Kalakip sa mga brand sang bakuna nga otorisado nga gamiton sa vaccination sang kabataan nga naga edad sang anum ka bulan tubtub lima ka tuig, amo ang Moderna.
Pfizer vaccine naman ang ginahatag sa mga kabataan nga naga edad sang anum ka bulan tubtub apat ka tuig.
Masobra na sa 70 milyones ka mga Filipino ang nakabaton sang bakuna sa bilog nga pungsod.
Kapin sa 9.5 milyones ka mga kabataan nga naga edad sang 12 tubtub 17 anyos ang nahatagan naman sang bakuna.
3.3 milyones ka mga kabataan nga naga edad sang lima tubtub onse anyos ang “fully vaccinated” okon nakaangkon na sang kumpleto nga bakuna.*
