Suportado sang Department of Education Negros Occidental Schools Division ang desisyon sang principal sang Negros Occidental High School (NOHS) nga si Josette Terora sa indi pagpahanugot sini nga makasulod sa buluthuan ang 13 tanan ka mga personnel sadtong Martes, Marso 1.
Nalakip sa mga wala ginpasulod amo ang 9 ka mga teaching kag 4 ka non-teaching staff.
Suno sa ginpapanaug nga pahayag sang Negros Occidental Schools Division, nagabase lamang si Terora sa polisiya sang DepEd kag wala ini nagadiskriminar sa mga manunudlo.
Ginaprotektahan lamang ni Terora ang siguridad kag ang ikaayong-lawas sang mga manunudlo pati na ang mga estudyante, may angut sa nakatalana nga pagbalik sang “face-to-face” classes.
Naga-apelar man ang schools division sa mga manunudlo nga magpabakuna ang mga ini agud ma proteksyunan ang ila kaugalingon.
Sa idalum sa DepEd Task Force Covid-19 memorandum no. 575 nga mga titulo “IATF Vaccination Requirement for Personnel Reporting on Site Beginning 01 December 2021” nga nagabase sa IATF Resulotion no. 148-B, gina-require ang mga personnel nga dapat “fully vaccinated” ang mga ini ukon regular nga magpaidalum sa RT-PCR test kag sila ang personal nga mag-gasto diri.*
by Randy Coronel
