Mataas sa gihapon ang vaccination rate sa Bacolod, suno kay Doctor Chris Sorongon, deputy for medical data and analysis sang Emergency Operations Center sa Bacolod.
Suno kay Sorongon, padayon ang mga nagapabakuna sa mga nagkalain-lain nga mga vaccination sites nalakip na diri ang mga barangay kag malls.
Ang mobile vaccination sang syudad ang wala man naga-untat sa pagkadto sa kada purok agud magpatigayon sang pagbakuna.
Masobra sa 70 porsyento sang mga senior citizens sa syudad ang sa karon bakunado na sang COVID-19 vaccine samtang malapit sa 130 porsyento naman sang eligible population ang fully-vaccinated.
Nagahingyu ang EOC sa mga pumuluyo sang syudad nga indi magkumpiyansa apisar nga yara na sa Alert Level 1 ang Bacolod.
Padayunon sa gihapon, suno kay Sorongon, ang pag-obserbar sang minimum health protocols ilabi na sa pampubliko nga lugar.*
by Aileen Pedreso
