Makabaton sang dugang nga mga benepisyo ang mga solo parents matapos nga isa na karon ka layi ang Expanded Solo Parents Welfare Act.
Nalakip sa mga benepisyo amo ang indi masyado istrikto nga requirements para sa work leaves, scholarships, discounts kag cash aid.
Makabaton man sang 7 ka adlaw nga paid leave ang mga solo parents kung ini sila ang employed sa indi magnubo sa anum ka bulan.
Samtang ang mga solo parents nga nagaganar sang minimum ukon manubo sa minimum wage ang makabaton man sang P1,000 nga cash subsidy.
Yadtong nagaganar sang indi magnubo sa P250,000 ang entitled naman sa 10% nga discount kag exemption sa value-added tax sa gatas sang bata, diapers, vaccines kag mga bulong tubtob nga mag-edad 6 ka tuig na ang ila bata.
Ang mga senior citizens ukon indibidwal nga may disability nga naga-serbe bilang solo parents ang maka-avail man sang discounts, magluwas sa ila mga personal nga benepisyo.
Automatic naman nga madala na ang mga solo parents sa National Health Insurance Program paagi sa PhilHealth, nga may premium contributions nga ginabayaran sang national government.
Sino bala ang makabig nga solo parents?
- Mga indibidwal nga solo nga naga-atipan kag nagasuporta sa ila bata bangud napatay ang bana ukon asawa ukon may physical incapacity
- Yadtong legal na ukon de facto nga separado sa sulod sang indi magnubo anum ka bulan
- Ginbayaan sang bana ukon asawa sa sulod sang indi magnubo sa anum ka bulan
- indi kasado nga iloy ukon amay
- legal guardian nga naga-atipan sa kabataan
- bana, asawa ukon miyembro sang pamilya sang isa ka overseas Filipino worker nga nalakip sa low/semi-skilled worker category, nga wala sa pungsod sa sulod sang 12 ka bulan
Agud nga maka-avail sang dugang nga benepisyo, kinahanglan nga i-presentar ang Solo Parent Identification Card. Makuha ini sa Solo Parent Office sang kada local government unit.*
