FACEBOOK, PLANO ISLAN ANG ILA PANGALAN

Magare-brand sa masunod nga semana ang social media giant nga Facebook gamit ang isa ka bag-o nga pangalan, suno sa The Verge.

Suno sa report, posible may kaangtanan ini sa “Horizon” ang mangin pangalan sang kompanya.

Sang nagligad lang, gin-islan sang Facebook ang pangalan sang ila in-development virtual reality gaming platform nga “Horizon” nga sa karon, “Horizon Worlds” na.

Suno sa report sang The Verge, plano ni Facebook CEO Mark Zuckerberg nga ma-estoryahan ang pagbag-o sang pangalan sang social media giant sa ila tuigan nga Connect conference sa Oktobre 28.

Nagaguwa ang report sang rebranding kasunod sang pag-atubang sang Facebook sa nagadamo nga kritisismo sa business practices sang kompanya halin sa U.S government.