MURCIA, NEGROS OCCIDENTAL– Napu-ag ang malinong nga kaagahon sang Sitio Maligbasa, Barangay Sta. Cruz, banwa sang Murcia, matapos matukiban ang isa ka fetus nga lalaki nga ginhal-id lamang sa higad sang dalan.
Suno kay Miguel Suarez alias “Bolato,” takna las-7:00 kahapon sang aga sang maagaw ang iya atensyon sa ginalagong kag nagapanimaho nga bagay sa higad sang dalan samtang ini ang magapadulong sa suba agud kuntani magakuha sang langka.
Gilayon nga nag-report si Suarez kay Punong Barangay Jomarie Gravino kag ginpahibalo naman sang Kapitan ang Murcia Health Center.
Sa pagkadto sa lugar sang mga midwife nga sanday Melbe Alvarez kag Aubrey Doctolero, ila naabtan nga nakakas na ang “umbilical cord” ukon pusod sang fetus.
Suno sa mga midwife, wala sang ano man nga putos ang fetus sang ila maabtan kun sa diin basta lamang ini ginpilak sa hilamonan.
Sa interview sang Radyo Bandera Bacolod kay Doctolero iya ginabulubanta nga 12 na ka oras ginbun-ag ang fetus nga sa ila paglantaw yara ini sa anum tubtob pito ka bulan.
Nagapanawagan naman si Doctolero sa kun sin-o man ang iloy nga nagbilin sang fetus nga magpadulong lamang sa Murcia Health Center kun luyag sini nga kuhaon agud mahatagan sang disente nga paglubong.
Dugang pa ni Doctolero kun ini makuha ang fetus, ang Murcia Local Government Unit (LGU) na lamang ang magalubong sini.
Sa interview kay Kagawad Lynette Nicavera iya ginpahayag nga base sang ila pagpangusisa sa mga pumuluyo wala sang narekord nga nagabusong sang amo nga lugar.
Ginalantaw nga posible nga pangayaw ang iloy nga nagbilin sa fetus.*
