BACOLOD CITY, NEGROS OCCIDENTAL– Napasakaan na sang kaso nga 3 counts of rape sa piskalya ang 24-anyos nga lalaki nga naghimulos sa 15-anyos nga dalagita sa siudad sang Bacolod, suno kay Police Major Joery Puerto, hepe sang Bacolod City Police Station 5.
Ginpahayag ni Major Puerto nga nabaton na sang piskalya ang mga dokumento kag nagpanumpa na ang tagreklamo.
Dugang pa ni Major Puerto, sa maabot nga isa tubtob duha ka bulan, papanaugan na sang warrant of arrest ang lalaki.
Suno pa kay Major Puerto nga kun sa diin pa magtago ang lalaki apang kun mapapanaugan na ini sang warrant of arrest, gilayon ini nga pangitaon kag dakpon.
Madumduman nga nagkadto sa Police Station 5 ang dalagita kaupod ang iya iloy kag nagreklamo angut sa paghimulos sang makatatlo ka beses sang lalaki sa iya.
Nagsugod ini tandugon sang lalaki sadtong Pebrero tubtob Marso sini nga tuig.
Wala gilayon nagpanugid ang dalagita sa iya ginikanan bangud ginpangunahan ini sang kakulba.
Lima na ka bulan sang mahibalu-an sang mga ginikanan nga nagabusong na ang dalagita.
Nagpaalintun naman si Major Puerto sa mga pamatan-on nga indi magsalig sa mga tawo nga nakilala lamang sa social media.
Pahayag naman ni Major Puerto sa mga ginikanan nga bantayan ang ila mga kabataan kag hibalu-on ang mga aktibidad kag kaupod nga mga barkada sini.*
