Ginkumpirmar sang Department of Health ukon DOH nga nagadamu gid man ang kaso sang Hand Foot and Mouth Disease ukon HFMD sa Pilipinas.
Apang, ginklaro sang ahensya, nga wala sang outbreak sang nasambit nga balatian sa bisan diin man nga lugar sa pungsod.
Base sa record sang DOH, 155 ka mga persona ang nagpositibo sa HFMD humalin sang Oktubre tubtub Disyembre 6 sa Metro Manila pa lamang, sa diin onse anyos paidalum ang edad sang kalabanan sa mga apektado.
Ginpasiguro ni DOH Officer in charge Maria Rosario Vergeire nga “preventable” kag “manageable” ang HFMD.
Ang Hand Foot and Mouth Disease, isa ka makalalaton nga impeksyon tuga sang “virus”.
Kalakip sa mga sinyales kag sintoma sini amo ang hilanat kag pagtubo sang mga “sores” okon rashes sa mga kamot, tiil kag baba sang bata. Malatnan sang FHMD ang isa ka indibidwal pinaagi sa “droplets” okon “direct contact” sa mga sip-on, laway, higko kag nana okon fluids nga naga gwa sa rashes sang infected nga indibidwal.*
