BACOLOD CITY – Isa ka senior citizen nga may balati-an nga Goiter kag nagaisahanon nga nagapangabuhi sa iya balay ang nanghikog-patay sa Barangay Ma-ao, syudad sang Bago, Negros Occidental, takna las 4:30 sang hapon sadtong Domingo, Pebrero 5, 2023.
Nasapwan nga nakabitay na ang 67-anyos nga biktima sa ila balayan gamit ang mga scarf, suno sa spot report nga ginpadala sang Bago Police Station sa Negros Occidental Police Provincial Office.
Hungod nga wala ginhingadlan sang Radyo Bandera Bacolod ang biktima bangud sensitibo ini nga balita.
Ginhingagaw pa kakas ang scarf sang iya utod nga lalaki nga nakasapo sa biktima, kag ini ang gindala sa Bago City Hospital apang gindeklarar nga dead on arrival.
Narekober sa balay sang biktima ang isa ka suicide note.
Suno sa utod nga lalaki sang biktima, nag-inaway paagi sa cellphone ang biktima kag ang ila isa pa gid ka utod nga babayi nga yara sa Manila mga las 12 sang ugto Domingo.
Nangakig ang biktima sa utod sini nga babayi bangud gin-claim sini ang iya mga benepisyo nga wala siya makahibalo. Matapos sang insidente, nagpang-lock ang biktima sa iya sulod balay kag natabo ang insidente.*
