NEGROS OCCIDENTAL– Bukas si Governor Eugenio Jose Lacson sa posibilidad nga magapatigayon sang cloud seeding sa probinsya agud mahagan-hagan nga epekto sang mainit nga tiempo sa mga pananom nga humay kag tubo.
Ini ang reaksyon sang Gobernador sa panawagan ni Negros Occidental 5th District Representative Dino Yulo sa Department of Agriculture (DA) kag Sugar Regulatory Administration (SRA) nga preparahan ang cloud seeding.
Apang ginklaro sang Gobernador nga kinahanglan nga pagatun-an kag ipanigurado ang timing sa paghiwat sang amo nga tikang bangud nagabatyag pa sa karon sang panalagsa kag lapta-lapta nga pag-ulan ang Negros Occidental.
Ginkumpirmar man ni Lacson nga sa ti-on sang El Niño naga-request ang probinsya sang cloud seeding sa DA kag National Government.
Nagapati naman ang Gobernador nga apektado sang dry spell indi lamang ang humay kundi ang tanan nga pananom sang probinsya.
Ginpahayag sang Gobernador nga sandig sa report sang Office of the Provincial Agriculturist (OPA) wala problema sa produksiyon sang humay sa Negros Occidental.*
