Pinasahi ang materyal nga gingamit sang artist nga si Rogelio Agupasa sang Brgy. Tiglawigan sa siudad sang Cadiz.
Ang kemikal nga bleach nga masami gina-usar sa pagpanglaba, gingamit ni Rogelio sa pagpinta sang nawong ni Apo Whang-Od sa t-shirt.
Sa interview sang K5 News FM kay Rogelio, ini ang iya una nga paggamit sang bleach kag wala ini nagdahum nga madamo ang manamian sang iya obra bangud charcoal ang kinaandan sini nga gamiton.
Suno kay Rogelio, nagsugod ang iya hilig sa art sang nagdaug ini sa isa ka art contest sang Grade 6. Apang wala ini nagpadayon sang high school bangud nahuya ini kag sa pagpati nga madamo sang mas ‘talented’ pa.
Sang yara na si Rogelio sa kolehiyo, nadiskubrehan sang iya manunudlo ang iya abilidad, rason ngaa siya ang masami nga ginabida sa mga paindis-indis.
Nagsugod man baton si Rogelio sang commissions samtang naga-eskwela kag ini man ang iya palangitan-an tubtob subong.
Madamo ang naka-apresyar sa mga obra sang 36-anyos nga Cadiznon nga nalakipan sang mga artista kag mga politiko.
Natalupangdan man sang isa ka daku nga media kag entertainment network ang obra ni Rogelio kun diin iya gin-sketch sa resibo ang mga karakter sang bantog nga Korean series nga “Squid Game.”
Mensahe ni Rogelio para sa mga kaangay nga artist, ipadayon ang nasuguran nga talento bangud may malab-ot gid sa ulihi.
“Indi pagsapakon ang mga tawo nga wala bilib kag gasuya sa imo. Himoa nga motivation kay kadamu achievements nga magaabot basta magpati lang sa Ginoo,” dugang pa sang Cadiznon artist.
