Nagsugod sa tawag nga ‘Tito’ kag nagresulta sa paghimulos sang 40-anyos nga E-bike driver sa 13-anyos nga babayi sa Barangay Taculing, syudad sang Bacolod sadtong Nobyembre 29.
Ang biktima ang masami nga nagaisahanon sa ila gina-rentahan nga balay bangud ginabilin ini sang iya amay nga nagapang-lasa sang karne sa merkado.
Sa interview sang Radyo Bandera Bacolod, ginpahayag sang suspek nga ginhagad siya sang biktima nga magkadto sa ila balay bangud may ipalihog sa iya.
Ginkakibot sang suspek pagsulod niya sa balay sang biktima nga nagahublas na ini.
Suno sa suspek nga tawo lang siya kag na temptar sang nakita ang biktima rason nga nahimo niya ang pagtandog.
Gindugang pa sang suspek nga ‘Tito’ ang tawag sa iya sang biktima.
Ang suspek ang halos 10 na ka tuig nga e-bike driver, may asawa kag duha ka kabataan.
Nahibaluan nga magkaingod-balay lang ang suspek kag ang biktima.
Nakahunong karon sa custodial facility sang Bacolod City Police Station-6 ang suspek.
Nagatinguha karon ang Radyo Bandera nga makuha ang update sa pagpasaka sang kaso sa suspek.
