AYUNGON, NEGROS ORIENTAL – Wasak ang isa ka motorsiklo samtang pilason ang backrider sini sa ginpatigayon nga “Negros Loop” sang Sabado, Oktubre 7, 2023.
Nagluntad ang aksidente sa Brgy. Kalag-kalag, banwa sang Ayungon, Negros Oriental takna las-11:50 sang aga.
Base sa inisyal nga imbestigasyon sang kapulisan, nagsaylo sa wala nga lane ang motorsiklo nga Suzuki Burgman Street nga ginamaneho ni Arny Mahusay, 50-anyos, may asawa, kag residente sang Brgy. Tabun-ac, banwa sang Toboso, Negros Occidental.
Nagresulta ini sa pagkabunggo sang motorsiklo sa kasugata nga tricycle nga Rusi Macho TC-150 nga ginamaneho naman ni Nick Lojario Abrea, 47-anyos, may asawa, kag residente sang Brgy. Atabay sa banwa sang Ayungon.
Nakaangkon sang mga pilas backrider sang motorsiklo kag pasahero sang tricycle.
Ang Negros Loop amo ang isa ka mototourism event nga luyag mapasanyog ang turismo sa isla sang Negros kag indi ini palumba.
Isa si Jet Lee, ambassadress sang Philippine Motorcycle Tourism, sa ginabuluubanta 1,500 ka riders nga nagpartisipar sa nasambit nga event.
