Patay na sang masapwan ang 47-anyos nga chief security matapos ginaalegar nga ginluthang ang iya kaugalingon sa Sitio Naga, Barangay Binicuil, siudad sang Kabankalan, Negros Occidental, takna las 8:30 sang aga, Biyernes, Oktubre 6, 2023.
Base sa report sang Kabankalan City Police Station, makapila ka beses nga ginatawag sang house helper ang biktima bangud naka-lock ang balay sini.
Sang wala gid nagasabat ang biktima, gilayon na nga nangayo sang bulig ang house helper sa mga upod sa trabaho sang biktima.
Didto na nila ginguba ang padlock sang puerthan sang balay kag nakit-an nila ang bangkay sang biktima kun sa diin may igo sang bala ang ulo sini.
Nahibaluan nga ginsaysay sang kaingod balay sang biktima nga nakabati ini sang lupok sang armas-luthang takna las 2:00 sang kaagahon sang Biyernes.
Gindala naman ang bangkay sa pinakamalapit nga ospital para sa nagakaigo nga disposisyon.*