Nabali ang tiil sang 62-anyos nga lalaki matapos nga mabungguan sang motorsiklo malapit sa Quick Fill Station sa Eco-Tourism Highway, Barangay Rizal, siudad sang San Carlos, Negros Occidental takna las 4:39 sang kaagahon, Domingo, Oktubre 8, 2023.
Ginkilala ang biktima nga si Antonio Pat alyas “Tony Bitay” nga residente sang Urban Phase 3 sa siudad sang San Carlos.
Samtang ang suspek ang ginkilala kay Mark Talido, 43-anyos kag residente sang San Juan Village, Urban Phase 3 sa nasambit nga siudad.
Base sa imbestigasyon sang traffic section department sang San Carlos City PNP, samtang nagalakat ang biktima padulong sa City Proper, aksidente ini nga nabungguan sang suspek nga padulong sa Urban direction.
Bangud sa mabaskog nga impact, nabali ang natuo nga tiil sang biktima samtang nakaangkon naman sang lagob sa lawas ang suspek.
Madasig nga nagresponde ang San Carlos City DRRMO sa ginluntaran sang aksidente kag gindala ang duha ka biktima sa ospital agud mahatagan sang medikal nga atensyon.*
