Arestado ang 20-anyos nga lalaki bangud sa pagpangawat sang scooter sa Sitio Manabacsabac, Barangay Bagroy, banwa sang Binalbagan, Negros Occidental, takna las 11:00 sang aga, Domingo, Oktubre 8, 2023.
Ginkilala ang suspek kay Bernie Cunahap y Judilla samtang ang tag-iya sang scooter ang ginkilala kay Jose Renante Soriano y Pausa, 39-anyos, lunsay mga residente sang nasambit nga lugar.
Base sa report sang Binalbagan Municipal Police Station, nadiskubrehan sang biktima nga nadula ang iya MIO 125S Matte Black Yamaha Scooter Model 2020 nga iya gin-park sa guwa sang ila nga compound.
Ginreport naman ini sang biktima sa mga kapulisan kag gilayon nga nagpatigayon sang hot pursuit operation nga nagresulta sa pagkadakup sa suspek.
Nakahunong karon ang suspek sa Binalbagan Municipal Police Station para sa nagakaigo nga disposisyon.*
