Natapos na ang pito ka tuig nga pagpangita sang isa ka iloy sa iya anak nga lalaki nga na-missing sadtong 2016 matapos sini nga ginkilala ang gamit sang iya anak nga aksidente nga nakita kaupod sa kalabera nga nahukay sa isa ka construction sites sa Minglanilla, Cebu.
Base sa report sang GMA News, ginreport sa kapulisan sadtong Oktubre 11 ang pagkadiskubre sa mga kalabera sa isa ka construction site sa Sitio Upper Lipata, Barangay Linao sa Minglanilla.
Kaupod sang nakutkot nga kalabera ang pila ka gamit kaangay sang jersey shirt nga may pangalan nga “Tapales,” boxer shorts, black belt, baller bands kag face towel.
Sang mahibaluan ni Saturnina Tapales ang pagkadiskubre sa kalabera, gilayon niya ini ginkadtuan kag ginkumpirmar nga gamit nga ini sang iya na-missing nga anak nga si Jolan Tapales.
Suno kay Saturnina, 24-anyos sadto ang iya anak sang gilayon na lamang ini nga na-missing kag wala na nakapauli sa ila nga balay sa Barangay Maghaway sa Talisay City sadtong 2016.
Ginkumpirmar naman sang Minglanilla Municipal Police Station ang pahayag ni Saturnina angut sa na-missing sini nga anak nga ginreport sa kapulisan.
Padayon pa ang imbestigasyon sang kapulisan angut sa nadiskubre nga kalabera.*
