Nagapangayo karon sang bulig ang pamilya Alacre sa Gobyerno Probinsyal agud mabuhinan ang mga balayran sa punerarya sa pagpreparar sang bangkay ni Loreta Alacre, isa ka caregiver nga napatay sadtong Oktubre 7 sang mag-atake ang Hamas sa Israel.
Suno kay Anabella Alacre, utod ni Loreta nga naghatag na sang financial assistance ang Department of Social Service and Development (DSWD) sang P40,000 para sa 5 ka ginapa-eskwela ni Loreta nga tatlo ka college student kag duha ka grade 11 student.
Suno pa kay Anabella nga wala sila sang dako nga kantidad nga makasabat sang tanan nga balayran tungod pigado lamang sila.
Kalakip sa ila kinahanglan nga bayran ang pagpreparar sang haya sang ila nga utod bangud kulang ang ginhatag nga assistance sang DSWD para mabayran ang tanan nga ila kinahanglanon para sa paghaya kag pagpalubong kay Loreta.
Suno kay Mayor Salvador Escalante, Jr. sang siudad sang Cadiz, bukas naman ang iya talatapan sa pagbulig para mapreparar ang haya ni Loreta sa Sitio Camay-an apang wala pa makapalapit ang pamilya sa Alkalde tungod may mga importante pa ini nga gina-asikaso.
Ginapreparar karon ni Anabella ang iya nga cenomar kag birth certificate bangud ini ang ginapangayo nga mga dokumento sang Overseas Workers Welfare Administration (OWWA) agud mapadala na sa Pilipinas ang bangkay ni Loreta kag maderetso sa iya balay nga nahamtang sa Sitio Camay-an, Barangay Cadiz Viejo sa siudad sang Cadiz.*
