Bastante karon ang supply sang baboy sa Negros Occidental apisar nga nagsaka ang demand sang konsumedores tungod sa selebrasyon sang Masskara Festival sini nga bulan sang Oktubre.
Suno kay Dr. Placeda Lemana, Provincial Veterinarian nga nangin bastante ang demand sang baboy bangud nagnubo ang exportation sang baboy sa pila ka lugar sa pungsod kun sa diin nagdangat ini anay sa 8,000 tubotob 10,000 apang sa karon yara na lamang ini sa 2,000.
Dugang pa ni Lemana nga Sipalay gid lamang ang LGU sa probinsya ang may yara sang Certificate of Free Status (CFS) sang Recognition of Active Surveillance for ASF nga ginatugutan sang Bureau of Animal Industry (BAI) nga mag-export sang baboy sa iban nga lugar bangud may 7 ka mga LGU sang probinsya ang anay nasudlan sang African Swine Fever (ASF) kag ang iban naga-proseso pa sang kinanglanon nga dokumento.
Gipaathag man ni Lemana nga nagnubo sadtu ang populasyon sang baboy sa probinsya sang 10% tubtob 15% apang wala ini makahatag sang dako nga impact sa industriya sang baboy bangud nayon lamang ang nagkalamatay nga yara sa irrigated areas tuga sang sala nga disposal pero ang nabukid nga lugar ang wala na-apektuhan.
Nangin rason sa pagnubo sang populasyon sang baboy sa probinsya sadto amo ang mortalities tuga sang Hog Cholera kag ASF, Culling ukon pagpamatay sang baboy nga posible nalatnan sang makalalaton nga masakit, pagpadala sang baboy sa iban nga lugar sa pungsod kag pagmasakit sang hinuptanan kaangay sang heat stroke kag iban pa.
Sandig sa price monitoring sang Provincial Veterinary Office (PVO) ang presyo sang carcas ukon karne sang baboy sa probinsya ang nagadangat sa P280 tubtob P315 kun sa diin, P280 tubtob P300 ang presyo sini sa siudad sang Bacolod, P310 sa banwa sang Binalbagan kag P315 sa siudad sang Talisay.
Gina-eskpektar naman nga magasaka ang presyo sini sa Disyembre ilabi na ang lechon baboy tungod sa pagsaka sang demand.*
