Pilason ang duha ka mga bata matapos ginbuno sang isa ka lalaki sa Sitio Banuyo, Brgy. Nangka, Bayawan City, sa Negros Oriental.
Base sa report sang K5 News FM Bayawan, nagluntad ang insidente takna las-11 sang gab-i sang Marso 15.
Ang mga biktima amo lunsay mga solterito kun diin ang isa amo ang 12-anyos nga residente sang Brgy. Alim, banwa sang Hinoba-an, sa Negros Occidental.
Samtang ang isa amo ang 13-anyos nga residente naman sang Brgy. Poblacion sa Bayawan.
Base sa imbestigasyon sang kapulisan, nagpadulong sa diskohan ang mga biktima kun diin hinali nga ginbuno sila sang suspek nga ginkilala kay Roy Aguirre, 20-anyos nga residente sang Gisocon sa Brgy. Nangka.
Naigo sa nawala nga bahin sang dughan ang 12-anyos samtang sa likod naman naigo ang 13-anyos.
Gindala ang mga biktima sa ospital samtang nadakpan naman ang suspek pinaagi sa follow-up operation.
