Ginhimo nga layi sang gobyerno sini nga Oktubre ang SIM Card Registration Act kung sa diin kinahanglan na nga ipa-rehistro ang mga ginagamit nga SIM card ukon Subscriber Identity Module.
Apang paano kag sa diin makaparehistro ang publiko? Paano kung duha ang SIM card nga ginagamit? Paano kung naka-plan?
![](https://i0.wp.com/radyobandera.com/wp-content/uploads/2022/11/SIM-card-registration.jpg?resize=696%2C385&ssl=1)
Nakatalana pa nga magpagwa ang National Telecommunications Commission (NTC) sang Implementing Rules and Regulations (IRR) sang layi, kaupod ang mga telecommunications companies kag iban pa nga stakeholders kapareho sang National Privacy Commission.
Kung mag-gwa na ang IRR, may yara sang 180 ka adlaw ukon anum ka bulan agud makaparehistro sang SIM card.
Nalakip sa mga impormasyon nga kinahanglan ihatag sang end user amo ang:
Full Name
Date of Birth
Sex
Address
SIM number
Para sa mga menor de edad, ang ila SIM card ang iga-rehistro sang ila ginikanan ukon guardian.
Sa idalum sang layi, ang public telecommunications entity (PTE) ang magapat-ud sang website kung diin makaparehistro ang mga end users.
Responsibilidad sang PTE nga dapat may yara man sila sang kaugalingon nga database kung diin pagataguon ang datos sang mga end users, nga sarang lang nila magamit agud i-process, i-activate ukon i-deactivate ang isa ka SIM ukon subscription.
Kung mapaslawan nga maka-register, sarang ma-deactivate ang SIM card.
Nagapati ang gobyerno nga mapahagan-hagan sang layi ang nagalapta nga text scam apang nagakahangawa ang pila ka mga privacy advocates sa bag-o nga layi.*