Dead on the spot ang duwa ka pulis sa Naga City, Camarines Sur matapos sila ginluthang sa separado nga lugar sang Sabado sang gab-e.
Suno sa report sang Police Regional Office 5, nagalakat pauli ang pulis nga si Police Master Sergeant Romeo B. Padua sang Police Station 1 halin sa iya nga duty.
Paglabay sini sa dalan sang Padi-an, Barangay Dinaga, hinali nalang ini ginlampusan sa ulo sang tubo nga dala sang suspek nga si Jerico Cano, 33 anyos.
Matapos malampusan, nadulaan sang animo ang biktima kag natumba.
Gilayon naman nga ginkuha sang suspek ang pusil sang pulis kag gintiro ini sa ulo.
Samtang, paglab-ot naman sang suspek sa Zone 4, Barangay Tabuco, ang isa pa ka pulis nga si Police Corporal Juarez Del Valle sang Police Station 5 ang gilayon man sini gintiro sa ulo.
Suno pa sa Police Regional Office 5, matapos ang pagpaniro, nagpauli ang suspek sa Sabang, Naga City nga nakuha pa magsingitan nga siya ang “hit man” kag didto na siya naabtan sang mga pulis nga nagresponder.
Naniro pa ang suspek sa mga pulis apang, natiruhan man ini rason sang iya kamatayon.
Nahibaluan nga nagaguwa sulod ang suspek sa prisohan bangud sa nagkalain-lain nga kaso nga may kaangtanan sa iligal nga droga.
