CADIZ CITY-Pila na ka beses nga wala ginapasugtan nga magpaligo sa suba ang 14 anyos nga lalaki bangod sa kakulba man sang iya sini nga ginhikanan kong mag-inulan.
Apang, sadtong Sabado nga adlaw, ginhagad ang biktima sang iya mga barkada nga magpaligo sa suba bangod maayo man ang tiyempo kag wala sang ulan.
Apisar nga ginpasugtan nila nga magpaligo ang ila bata sa suba yara sa giyapon sa ila balatyagon ang kakulba.
Sa inisyal nga impormasyon, samtang nagapaligo ang biktima upod ang iya sini nga barkada, wala niya natalupangdan nga amat-amat na ini ginahigop sa porsyon sang tamborong bangod man sa dala sang mabaskog nga current sang tubig sa overflow.
Gintinguhaan pa nga masalbar ang biktima sang iya mga kaupdanan apang wala na ini nabuligan bangod lunsay mga menor de edad kag indi kasarang nga mabatuan ang current sang tubig.
Suno naman sa amay sang biktima nga si Ricky Bitong nga nakibot na lamang ini nga nagpadulong sa ila puluy-an ang besftriend sang biktima nga kaupod niya man paligo kag nagpabalo nga may natabo nga malain sa iya nga bata.
Gilayon naman nga nagpadulong si Ricky sa overflow kag gintinguhaan nga makuha ang lawas sang biktima sa tamburong apang wala na ini nagaginhawa.
Gindala pa sa Cadiz Emergency Clinic ang biktima apang gindeklarar nga dead on arrival.
