BACOLOD CITY– Kasado na ang 17 ka mga proyekto sang Bacolod LGU nga pagapondohan nagikan sa P4.4 bilyones nga loan sang siudad sa Development Bank of the Philippines (DBP) kun sa diin ang loan agreement ang ginpirmahan sang Alkalde sang nagligad nga semana.
Sa interview sang Radyo Bandera Bacolod kay Councilor Jude Thaddeus Sayson, Chairman sang Committee on Finance and Appropriations, iya ginpahayag nga sa pagnubo sang loan sang siudad ginpabilin ang mga importante nga mga proyekto sang siudad apang ang Under Ground Cabling ang gindula samtang ang Central Archives System sang siudad ang igabutang sa Bacolod Museum sa proyekto ni Senador Migz Zubiri.
Pila ka mga development projects sang siudad ang gin-panubu-an ang alokasyon parehas na lamang sang Landbanking nagikan sa P2 bilyones ini ang nangin P1.5 bilyones para matukodan sang mga pasilidad sang Bacolod LGU para mapalapad ang serbisyo sa pmumuluyo.
Sa pagautangon sang siudad nga P4.4 bilyones ang mga development projects nga pagatukodon amo ang Legislative Building nga P515 milyones, pagtukod sang lima ka mini hospital sa mga barangay sa siudad nga nagabalor sang P135 milyones, rehabilitation kag improvement sang Old City Hall P223 milyones, rehabilitation kag improvement sang tatlo ka major markets sang Bacolod P525 milyones, construction kag improvement sang mga dalanon sa Bacolod P270 milyones, construction kag improvement sang drainage system sa Bacolod P300 milyones, asphalt overlay P50 milyones.
Sa loan sang siudad naupod man ang pagtukod sang Bacolod warehouse P67.9 milyones, construction of City Engineering Motorpool area P30.8 milyones, improvement of tree park sa Barangay Alangilan P47 milyones, construction of pedestrian mall P50 milyones, construction kag improvement sang City Health Complex P220 milyones, recovery kag recycling complex kag eco park P103 milyones, furniture and equipment P279 milyones, construction and installation of solar power generating system of various barangays and BCGC P100 milyones kag pagtukod sang traffic signalization P25 milyones.
Suno pa kay Councilor Sayson, yara na karon ang siudad sa documentation nga kinahanglan sang DBP kag sa bag-o nga polisiya sang bangko ang resolusyon nga authority to sign ang dapat pagahimu-on nga ordinansa nga pagapirmahan ni Mayor Albee Benitez.
Ang loan sa sang Bacolod LGU sa DBP nga P4.44 bilyones ang may interest rate nga 3.55% kada tuig sa sistema nga progress billing, buot silingon indi magbayad ang siudad sa loan tubtob wala masugudan ang development projects kag ang pamaagi sang pagbayad sang DBP sa contractor ang nakadepende man sa natapos nga proyekto.*
