Patay ang duha ka mga persona samtang pilason naman ang tatlo ka iban pa matapos masunog ang fuel tanker sang mahulog sa taytay sa Bagabag, Nueva Vizcaya Doimggo sang gab-i.
Suno kay Police Maj. Romeo Barnachea Jr. hepe sang Bagabag Police Station, gikan sa Pulilan Bulacan ang tanker nga may karga nga 40,000 ka litro sang krudo.
Padulong kuntani ini sa Isabela, apang sang pagsulod sini sa San Lorenzo Bridge sa Barangay Baretbet, Bagabag, nagbunggo ini sa nawala nga railings sang nasambit nga taytay.
Gilayon nga nahulog ang tanker kag gindakop sang kalayo.
“Nakausap natin ‘yung isang survivor, parang naka-idlip daw ‘yung driver nila… Ang bilis daw ng pangyayari,” pahayag ni Barnachea.
Narekober ang bangkay sang ginapatihan drayber kag pahinante sang tanker. Indi na makilal-an ang mga ini bangud lunsay sunog ang ila mga lawas.
Samtang, gindala naman sa ospital ang tatlo ka mga lalaki nga nakisakay lamang sa amo nga tanker.
Nalakip man sa nasunog ang bunkhouse sa idalom sang taytay apang maswerte nga wala naman sang nasamaran sa mga trabahador bangud nga nakadalagan ang mga ini sang matabo ang insidente.
