Naghilibion ang iloy nga si Rosalie Estante nga indi mabaton ang kamatayon sang iya anak nga si Rex Estante, alyas “Jekjek”, sang Purok Riverside, Barangay Ma-ao sa ciudad sang Bago, Negros Occidental.
Si Rex ang wala na matabangan sang naiguan sang kilat samtang nagapanghilamon kaupod sang iya duha ka mga kaupdanan sa katubuhan sa Hacienda Begonia, Barangay Ma-ao, takna las 2 sini lang nga hapon, Mayo 20, 2021.
Sanday Reynaldo Dionela, 46-anyos kag Wilfredo Palarion, 43-anyos, pareho residente sang banwa sang Calatrava kag naga-obra sa kampo sa Ma-ao, ang nakabatyag man sang impact sang kilat, rason nga sila ang natumba.
Dako ang pagpasalamat nanday Reynaldo kag Wilfredo nga wala sila masamaran sa insidente, apang ini sila ang nagakasubo nga nadulaan gid sang kabuhi si Rex, nga amo ang nagabulig sa iya iloy sa galastuhon sa ila panimalay, matapos nga napatay man ang amay sini sang Marso.
Suno kay Rosalie, si Rex, nga ika-pito sa iya 11 ka mga kabataan, ang mapisan kag mabinuligon sa ila sulod balay kag nagasuporta sa ila mga galastuhon.
Ginsaysay ni Rosalie nga antes sang insidente, nagpangutang pa si Rex sang P100 sa iya gina-obrahan agud nga may iplete ang iya nanay padulong sa proper Bago para makakumpanyar sa lubong sang ila paryente.
Naka-abot lang gid si Rosalie halin sa proper Bago kag nagpasilong sa isa ka bangga malapit sa ila balay bangod sang mabaskog nga ulan kag pagpangilat. Apang likom sa iya ihibalo nga naigo na gali sang kilat ang iya bata.
May mga sunog sa lawas kag may nagagwa na nga dugo sa dulunggan sang biktima.*
