Bangud sa pagpasirado sa 175 ka Philippine Offshore Gaming Operators (POGO) sa pungsod, makipagsapol karon si Justice Secretary Jesus Crispin Remulla sa mga opisyal sang Chinese Embassy angot sa pagpa-deport sang yara sa 40,000 ka Chinese nationals nga nadulaan sang trabaho.
Ini ang ginsiling ni DOJ Assistant Secretary kag Spokesperson Jose Dominic Clavano IV nga ang pagsinapol ang patigayunon sa DOJ main office sa Manila.
Diri igasumiter ni Remulla ang nagakadapat nga aksyon para sa mga Chinese nationals nga nagapabilin sa gihapon sa pungsod kag ang kanselasyon sang mga POGO companies.
Ini ang mangin pinakauna nga pagsinapol sang DOJ sa mga opisyal sang China angot sa isyu sang POGO.
“There must be a coordinated effort between the two countries to bring them back to China given that they have no more basis to stay here in the Philippines,” pahayag ni Clavano.
Una na nga ginsiling ni Remulla sa Senado nga magahimo sang ‘humanitarian crisis’ ang pagpasirado sa mga POGO bangud sa mahugot nga polisiya sang China sa pagpabalik sa ila citizens nga nagatrabaho sa mga ‘gambling companies’ sa guwa sang ila pungsod.
Mahugot karon ang protocol sang China sa liwat nga pagbaton sang ila mga citizens.
Pamatood sini ang kabudlayan sa pagpabalik sa mga Chinese Citizen nga nadakpan sadtong 2020 nga gin guba pa ang ila mga pasaporte sang mga otoridad sang China.
Sa karon, madamo sang mga mamalidha ang nagapanawagan nga ipauntat na ang operasyon sang POGO sa pungsod bangud sa mga ginatuga nga serye sang kidnapping, pagpanuhol kag pagtaas sang iban pa nga krimen nga gina imbolbaran sang mga Chinese.
