HINOBA-AN, NEGROS OCCIDENTAL – Patay kag halos mahukas na ang liog sang isa ka lalaki sa nagluntad nga pagpanglabo sang wala pa makilala nga mga suspetsado sa Sitio Bagtingon, Purok 7, Brgy. Asia, sa banwa sang Hinoba-an.
Ginkilala ang biktima nga si Mistocles Juliane, 49-anyos, may asawa, kag residente sang nasambit nga purok.
Nakit-an na lamang ang bangkay sang biktima sang iya bata takna las-5:30 sang kaagahon sang Sabado , Nobyembre 12.
Base sa report sang Hinoba-an Municipal Police Station, natukiban ang bangkay nga may madalom nga mga pilas sa may nawala nga bahin sang nawong, natuo nga dulunggan, kag halos mahukas na ang liog.
Suno sa bata sang biktima, nagkadto sila sa ila uma las-7:30 sang aga sang Biyernes, Nobyembre 11 apang ginbayaan sini ang iya amay las-10:30 matapos ini ginmanduan nga mangita sang mabakal sang ila ginabaligya nga upa.
Apang dugang pa sang bata, wala makapauli ang iya amay tubtub pagkasunod nga adlaw sang Sabado.
Ginpangita sini ang iya amay tubtub nga nadiskubrehan sini ang bangkay.
Igapaidalum ang bangkay sa post-mortem examination samtang nagapadayon ang imbestigasyon agud makilala ang mga suspek kag mahibaluan ang motibo sa pagpatay.
