BACOLOD CITY—Nagdangat sa 52 ka balay, 55 ka pamilya kag 250 ka mga indibidwal ang naapektuhan sang sunog sa Prk. Neptune Brgy. Singcang Airport alas-4:00 ang takna sini gid lamang nga hapon.
Ini ang base sa inisyal nga lista sang barangay sa mga nangin apektado sang nasambit nga sunog.
Nahibalaun nga ang kalayo ang nagikan sa balay ni a certain ‘Tiding’ sa diin may nabatian pa nga linupok ang mga tupad balay sini antes mag-ibwal ang kalayo.
Ginkasubo naman ni Punong Barangay Rosinie Distrito ang natabo kag nagpangayo ini sang dugang nga bulig sa publiko para sa mga nasunugan niya nga mga residente.
Dugang pa sini, ang mga maluyag magbulig ang mahimo lamang nga makahatag sang deretso sa mga nasunugan bisan indi na pag-ipagi ang bulig sa barangay basta padayon lang sa gihapon ang pag-obserbar sang ginapatuman nga basic health protocols agud nga malikawan ang paglapta sang virus.
Temporaryo naman karon nga magapabilin sa JR Torres Elementary School ang mga nasunugan.
