Yara sa siyam ka kabataan nga naga-edad 7 tubtob 12 anyos ang pilason sa paglupok sang 40mm grenade sa Sitio Tinago, Brgy. Candadam, Baybay City, Leyte alas 3:15 sang hapon, Miyerkules, Nobyembre 9.
Ginsiling ni Police Master Sergeant Alwin Laurente, case investigator, nga nakabaton sila sang tawag angot sa insidente kag gilayon nga nagresponder agud beripikahon ang report.
Sa inisyal nga imbestigasyon, nakit-an sang isa ka 8 ka tuig nga bata ang isa ka metal sa isa ka videoke bar.
Ginhampangan niya ini kaupod ang iya abyan nga wala sang ideya nga bomba ini.
Ginsiling naman sang bomb squad nga ang bomba nga 40 mm grenade ang masami makita sa babaw sang high powered automatic rifle ukon “grenade launcher.”
Gindala naman ang mga pilaso nga biktima sa Immaculada Conception Hospital sa Baybay City.
