Nagpahanumdum si Bacolod City DSSD-Head Pacita Tero sa mga pumuluyo nga nagkuha sang 1st tranche sang ayuda halin sa social amelioration program sa ciudad nga indi lang danay magpangutang samtang wala pa sang kasiguraduhan kung liwat nga madala ang ila sini nga mga ngalan sa 2nd Tranche sang SAP.
Sa exclusive interview sang Radyo Bandera Patrol Team kay Deparment of Social Services and Development (DSSD) Head Pacita Tero, iya sini ginhambal nga sa maabot nga second tranche istrikto nga pagapatigayunon ang re-validation kag cross checking agud malikawan ang pagkuha sang doble nga ayuda.
Nagakahulugan nga posible may yara sang mga pumuluyo nga indi makakuha sang ikaduha nga ayuda sa tion mahibaloan nga may yara na ini sang iban nga benepisyo nga nakuha sa iban nga ahensya kag miembro na ang iya sini nga pamilya sang 4Ps kon sa diin nagapuyo lang sa isa ka balay.
Makabig naman nga maayong balita bangod may yara sang kapin 15,884 ka mga “wait listed” ang makabaton sang P6,000 nga ayuda halin sa SAP subong nga bulan, ini ang mga pumuluyo nga qualified sa ayuda sang 1st tranche apang wala makakuha lakip na diri ang mga pensioner nga may yara sang minimum nga P6,000 nga combined pension kada bulan.
Nahibaloan nga sa una nga ayuda may yara sang kapin 98,143 ka pamilya ang nakabaton sa ciudad kon sa diin naglab-ot ini sa masobra P500-milyon.
Sa karon wala pa sang klaro nga budget ang igahatag sang National Government suno kay Tero kay ginahulat pa ang listahan nga ila sini igahatag nga amo ang basihan sang ila sini nga budget.
