Gin supal-pal ni Vice President Leni Robredo ang katapo sang Bureau of Internal Revenue’s (BIR) matapos nga magpahayag ini nga pagakuwaan sang tax ang mga online sellers nga makabig nga mga small entrepreneurs.
Sa pahayag ni Robredo nga nagatinguha ang mga indibidwal nga makakuha sang pangabuy-an online sa tunga sang pandemic, kay gani imbes nga hingabuton sang BIR nagakadapat suno sa bise-presidente nga i-encourage pa ang mga ini nga magnegosyo.
Sa isa ka interbyu sa radio ginpahayag ni Robredo nga sa idalum sang BMBE Law 2002 nakabutang diri ang exemption sa pagbayad sang tax sa mga micro, small kag medium enterprises ukon (MSMEs).
Dugang pa ni Robredo nga ang dapat hatagan sang atensyon sang BIR amo ang POGO nga may yara sang kapin P50-bilyon nga wala nabayaran nga tax sa pungsod.
Maduduman nga sang gintalikdan nga semana nagpahayag ang BIR pamaagi sa pagpaguwa sang Revenue Memorandum Circular No. 60-2020 kon sa diin ginmandu sini nga magparehistro ang mga online sellers sang ila negosyo kag i-deklara ang ila sini nga income bag-o mag Hunyo 31.
Dugang pa sa memo sang BIR nga ang mga exempted gid lang sa tax amo ang mga online sellers nga may yara sang P250,000 nga income kada tuig.
Nahibaloan nga madamu sang mga netizens ang nagpamalabag sa mandu sang BIR bangod para sa ila ini lang ang pamaagi nga mabuhi sila sa tunga sang pandemic kag sa limitado nga benepisyo sang gobyerno.
