Magluwas sa duha ka mga persona nga nabawian sang kabuhi, bangud sang mabaskog nga linog sa Mexico, nakaangkon man sang kahalitan ang masobra sa 3,000 ka mga struktura sa nasambit nga pungsod.
Nagluntad ang 7.7 magnitude nga linog sa Mexico sang tinalikdan nga Setyembre 19.
Na record ang epicenter malapit sa Pacific Coast kag may kadalumon nga 15 kilometros.
Ginabulong na sa ospital ang 26 ka mga persona nga nasamaran.
Base sa record sang mga otoridad, 3,161 ka mga puluy-an, education centers kag health centers ang nagkalaguba bangud sang kalamidad.
Ginatos pa gid ka mga pagtay-og okon aftershocks ang na record matapos ang 7.7 magnitude earthquake.
Nagluntad ang nasambit nga pagtay-og, matapos nga ginpatigayon ang emergency drills sa Mexico City sa diin minilyon ka mga indibidwal ang nagpakigbahin.
Ginapatigayon ang emergency drills sa Mexico, bilang pagpanghanda sa masunod pa nga mga kalamidad.
Matandaan nga sang Setyembre 19, 1985, nagluntad ang 8.1 magnitude nga linog sa Mexico, sa diin kapin sa 10,000 ka mga persona ang nagkalamatay.
Suno sa national seismology agency, coincidence lamang ang pagluntad sang linog sang lunes, nga pareho man sa petsa nga nagluntad ang mabaskog nga linog sang tuig 1985.
