Isa ka wala pa makilal-an nga katapo sang New People’s Army ang napatay sa nagluntad nga engkwentro sa tunga sang 94th Infantry Battalion, 3rd Infantry Division, Philippine Army sa Sitio Maliko-Liko, Barangay Carabalan sa syudad sang Himamaylan, Negros Occidental kaina sang aga, Lunes, Enero 9, 2023.
![](https://i0.wp.com/radyobandera.com/wp-content/uploads/2023/01/Carabalan-Negros-Occidental.png?resize=696%2C392&ssl=1)
Nakabaton sang report ang 94th IB may angut sa mga miyembro sang NPA nga nagapangayo sang pagkaon sa nasambit nga lugar gani nagresponde sila.
Ini ang nagresulta sa lima ka minuto nga pagbayluhanay sang lupok sa tunga sang duha ka mga grupo.
Kapin 10 ka mga miyembro sang NPA nga kabahin sang Central Negros 2- Komiteng Rehiyon Negros Cebu Bohol Siquijor ang na-engkwentro sang mga soldado.
Narekober sa encounter site ang isa ka M14 rifle, isa ka M4 rifle, isa ka M79 grenade launcher, duha ka M16 rifle, isa ka rifle grenade, pito ka M14 rifle, magazines kag mga bala, isa ka M4 rifle magazine kag ammunitions, apat ka grenade launcher ammunitions, duha ka bandoliers, isa ka backpack, hayahay sang NPA kag supersibo nga mga dokumento.
Pahayag naman ni Colonel Michael Samson, 303rd Brigade Commander, ang paghatag sang impormasyon sang mga pumuluyo ang naga-pamatuod lang nga amat-amat na nga nagakadula ang suporta sang mga lokal nga residente sa NPA.*