BACOLOD CITY – Ginkumpirmar ni Police Major Joery Puerto, hepe sang Bacolod Police Station 8 nga wala na sang plano nga magpasaka sang kaso ang pamilya sang taxi driver nga nabungguan-patay sa dalan Araneta sa atubang sang Golden Field Commercial Complex sa Brgy. Singcang sa siudad sang Bacolod.
Sa interview sang Radyo Bandera, ginsiling ni Puerto nga maga-atubangay subong nga adlaw ang pamilya sang biktima nga si Leonilo Borbon kag sang suspek nga si Miguel Joemarie Gialogo.
Ila naman nga ginahulat nga magpirma ang pamilya ni Borbon sang affidavit of non-interest bilang pagpahayag nga wala na ang mga ini sang interes nga magpasaka pa sang kaso.
Ginkumpirmar man ni Puerto nga ila na ginrelease si Gialogo bangud nagtapos na ang reglementary period sini las-dose kaina sang udto.
Nahibaluan nga sang tinalikdan nga Sabado sang kaagahon, nabungguan ni Gialogo si Borbon, kag bangud sa impact sang pagkabunggo nagtapik ang biktima sa windshield sang Suzuki Ertiga nga ginamaneho sang suspek apang natigayon pa sini nga makadrive tubtob nga nakalab-ot ini sa Brgy.3.
Sa imbestigasyon sang kapulisan, gin-nerbyos si Gialogo sa natabo kag wala ini nakahibalo sang dapat himuon kabangdanan nga nakalab-ot pa ini sa ginsang-an sang Lacson kag BS-Aquino Drive sa Brgy.3.*
