VICTORIAS CITY – Nagadangat sa malapit tunga sa milyon ka pesos ang balor sang ginasuspetsuhan shabu nga nakuha sa ginpatigayon nga buy-bust operation sa Hacienda Nordson, Brgy. 14, siudad sang Victorias takna las-2:30 sang hapon sang Lunes, Abril 3.
Ginkilala ang suspetsado nga si Rolin De Arroz, 52-anyos, may asawa, residente sang Daan Banwa, Brgy. 9, sa nasambit nga siudad, kag ginakabig nga high-value individual (HVI) sang kapulisan.
Base sa report sang Victorias City Police Station, nakumpiskar sa suspek ang isa ka putos sang ginasuspetsuhan shabu nga ginabulubanta nagabug-at sang 70 ka gramos kag nagabalor sang P476,000.
Gindala ang suspek sa nasambit nga police station para sa nagakaigo nga disposisyon.