Manila, Philippines – Halin sa masobra 10 ka tuig, isa ka tuig nalang ang actuarial life sang Philippine Health Insurance Corporation (Philhealth).
Ini ang gin-aku ni Philhealth Senior Vice President for Data Protection Office Nerissa Santiago sa pag-arangkada sang pagsinapol sang Senate committee of the whole kahapon.
Suno kay Santiago, possible nga indi na sila makahatag sang benepisyo sa mga miyembro sini sa 2022.
Sa pagpamangkot ni Senate Minority Leader Franklin Drilon, ginsiling ni Santiago nga sa ila pagtaya, sa pagtapos sang tuig, magalab-ot na sa P90 bilyon ang ila losses kag sa pagtapos sang 2021, magalab-ot sa P147 bilyon.
Dugang naman ni Santiago nga kung indi sila mahatagan sang dugang nga subsidiya sang gobyerno, possible indi na masarangan pa sang Philhealth ang paghatag sang mga benepisyo.
Sa nasambit nga pagsinapol sang mga senador ang mga opisyal sang PhilHealth kaangot sa ginsiling nga anomalya sa ila talatapan.
Ginkuwestyon ni Senador Panfilo Lacson ang ginapatihan nga anomaliya sang pagpaguwa sang advance nga pondo para sa ila nga medical facilities, kalakip ang dialysis centers kag mga maternity package sa idalom sang Internal Reimbursement Mechanism nga para kuntani sa COVID-19 treatment.
Pila sa ginsambit ni Lacson ang pagpaguwa sang kabilugan nga P45.176 milyon sa B. Braun Avitum Philippines Free Standing Dialysis Center, pati man ang P226.38 milyon nga maternity package.
Ginklaro naman sang mga opisyal sang Philhealth nga ginhatagan sang pondo apisar ang mga non-COVID-19 patients bangod nakabutang sa ila nga programa nga tanan nga ospital nga may pending claim ang dapat mahatagan.
Ginbuking ni Senador Francis Tolentino nga nakabaton sila sang impormasyon nga partikular sa Cebu, nga gindeklarar nga may COVID-19 ang ila pasyente agud makasukot lang sa Philhealth.
Ginkuwestyon man ni Lacson ang mga opisyal sang PhilHealth sa pagbakal sang overpriced nga network switch layer.
Sa datos nga gin-presentar ni Lacson, sadtong tuig 2019, nagbakal ang Philhealth sang switches sa balor nga P4.81 milyon imbis ang market price sini ang nagabili sang P939,360 lang ukon overpriced sang P3.87 milyon.
Apisar nga nakatago lang sa bodega ang mga equipment, liwat sa giyapon nga nagabakal ang ahensya nga magbakal sang dugang nga switch.
