Ginpaathag ni anay Comelec Commissioner kag karon P3PWD Representative nga si Atty. Rowena Guanzon nga nangturisok siya sa viral video bangud ginsakit siya sang iya ginsaway nga duha ka tawo nga gina-alegar hubog kag nagapanigarilyo sa sidewalk sa tion sang Dinagsa Festival sa Cadiz City sadtong Domingo, Enero 29, 2023.
Suno sa interview sang Radyo Bandera kay Guanzon, nagpadulong siya sa atubang City Health agud sugaton ang iya duha ka hinablos nga taga-Bacolod nga gina-alegar ginbastos kag ginkastigo sang pila ka mga babayi kag miyembro sang LGBTQ+.
Pag-agi nila sa sidewalk sang nasambit nga lugar, ginsaway niya ang duha ka tawo nga naga-inom sang beer kag nagapanigarilyo bangud may balatian ini nga asthma.
“kay kabalo kamo nga nagabaston ko ‘di bla kay may gina-arthritis ko, may duha ka tawo nga nagatindog sa sidewalk nga naga-inom sang beer kag nagawaras-waras sang sigarilyo, ako nga daan kontra ko ang sigarilyo kay may asthma man ko,” suno kay Guanzon.
Imbes nga magpati ang duha ka tawo, ginsinggitan siya, ginbangga ang iya abaga kag ginlapakan ang iya nawala nga tiil nga may deperensya.
Bangud diri, nangturisok kag naghambal sang indi manami nga tinaga si Guanzon.
Ginkumpirmar naman niya nga duha ka komosyon ang natabo sadtong tion kag lain ang nagbastos kag nagsakit sa iya kag sa iya duha ka hinablos.
Dugang pa ni Guanzon nga ginpapriso na niya ang duha ka tawo nga nagsakit sa iya.*
