Ginluthang-patay samtang nagalakat sa Cebu City sadtong Lunes nga adlaw ang babaye nga nagpasaka sang kaso batok sa 11 ka pulis.
Samtang, ang isa sa mga pulis nga ginreklamo, ang nasapwan nga wala na sang kabuhi kag ginapatihan nga gintiro ang kaugalingon.
Sa palayag sang Police Region Office 7 kahapon nga adlaw, Martes, nagalakat sa N. Bacalso Avenue ang biktima nga si Ritchie Nepomuceno sang ini ang ginluthang sang duwa ka suspetsado nga nakasakay sa motorsiklo.
Matapos ang pagluthang, nagpalagyo ang mga suspetsado.
Nakaangkon si Nepomuceno sang igo sang bala sa nawong nga amo ang nangin rason sang iya hinali nga kamatayon.
Suno kay Police Major Alejandro Batobalonos, hepe sang PNP Integrity Monitoring and Enforcement Group-Visayas, si Nepomuceno ang nagsumiter sang reklamo batok sa 11 ka pulis nga naka-asayn sa Sawang Calero Police station sadtong nakaligad nga bulan.
Ginsiling pa ni Batobalonos nga isa ka oras matapos ginpatay si Nepomuceno, nakita naman nga patay ang isa sa mga pulis nga ginreklamo.
Suno kay Batobalonos, ginahibalo pa sang mga imbestigador kung may koneksiyon ang duwa sa insidente.
