(Disclaimer: Hungod nga gintago ang ngalan sang biktima bangud sensitibo ini nga balita.)
NEGROS OCCIDENTAL – Nakaangkon sang madamo nga lapnos sa iya kamot, dughan kag guya ang isa ka dalaga matapos naglumpat sa nagahara-hara nga tricycle bangud wala ini gindulog sang drayber sa dapat niya nga panaugan sa isa ka lugar sa Negros Occidental
Natabo ang insidente sa city proper sang syudad sang Cadiz, Negros Occidental, tinalikdan nga Domingo sang gab-i, Oktubre 16, 2022.
Suno sa dalaga, siya lang isa ang pasahero sang tricycle kag ginlapaw pa siya sini. Madasig ang pagpadalagan sang tricycle kag wala ini makahibalo kung diin siya dal-on.
“Hambal ko nga please manaog nalang ko e pundo nya ang tricycle pero wala yako ginapati. Gihambalan yako nga gaan yalang ko daw kwarta,” panaysayon sang dalaga.
Nag-rattle ang dalaga kag tuman ang kakulba sini tubtob nga nakapinsar ini nga maglumpat na lang pagwa sa tricycle.
Apisar nga madasig ang pagpadalagan sang tricycle, naglumpat gid ang dalaga kag nagtupa sa semento sa tunga sang highway.
Wala nagbalikid ang tricycle driver kag nagrekta lang ini papalayo.
“Pasalamat ko kaayo sa Ginoo tungod amolang ni nadangtan ko. Although wala gid ko naka prepared sa mga natabo that time but God knows paano naglumapaw kakulba ko tungod sa abi ko indi nako kaluwas kag amo natu katapusan ko,” suno pa sa dalaga.
Nakuhaan lang sang CCTV ang tricycle kag suno sa dalaga, ginapangita pa sang kapulisan ang drayber.
Napaslawan naman ang dalaga nga makuha ang plate number sang tricycle kag indi niya kilala ang drayber.
Apisar sang natabo, ginpakamaayo sang dalaga nga i-share ang iya gin-agyan agud nga makapalagnag sang awareness sa kadam-an, ilabi na sa mga teenager nga babayi.
“If maglagaw kamo pleaseeee always gid kamo preparar sinyo SECURITY CONSCIOUS!! Always nyo gid bal on ang plate number ka mga tric or whatever dira nga masakyan ninyo maski papuli man kamo or diin kamo pakadto. Labi nada, indi gid kamo pagab e pauli labi na gaisahanon kamo,” dugang pa sang dalaga.*
