BACOLOD CITY – Ginpakigbahin sang isa ka netizen sa social media ang iya eksperyensya kun diin ginapatihan nga nakawatan ini sa may Bacolod South Terminal.
Suno sa post sang netizen, natabo ang wala ginalauman nga insidente kahapon sang Sabado, Hulyo 22, 2023.
Papauli na kuntani halin sa tatlo ka adlaw nga seminar sa siudad sang Bacolod ang biktima nga nagabakintol sang iya kagamitan.
“I was carrying a big shoulder bag, backpack, Laptop, water bottle, a plastic cellophane na may unod and akon cellphone… Nag butang na ko daan inugplete sa akon bulsa para indi na ko ka bukad sang akon coinpurse sa jeep.”
Nakatupad sang biktima ang babayi nga suspetsado sa ginsakyan sini nga jeep (Shopping-La Salle).
Sang manaug na kuntani ang biktima, nagdungan ang suspek kag nabungguan pa sini ang biktima, apang wala nanaug sa jeep ang suspek.
“Gn balikid ko sa tulok kag amo to na identify ko iya chura, bayo kag bag. Pag panaog ko na, nag pabilin sa sa jeep. Wala man lang sa gali na naog. So abi ko haras-haras lang gd sa ya.”
Pasulod na ang biktima sa terminal sang matalupangdan sini nga ginbuksan ang iya backpack kag wala na ang ginsulod sini nga coinpurse.
Nakit-an sang biktima nga nagpundo ang jeep sa unhan kag ginlagas niya ini.
“Si chay nanaog kag ga hana na nga masaylo sa isa pa gd ka jeep. Bisan damo2 ko dala, nag dalagan gd ko kag gn lagas sa, asta nga naabtan ko gd sa… Sang lapit na ko sa iya gn kaptan ko sa sa buhok kag gn hambalan ‘Diin ang walllet ko?’ Gapanginwala pa sa. Pero wala ko gd sa gn buy.an. Amo to gn tumpukan na kami ka mga taho.”
Nakit-an sang biktima nga yara sa kamot sang suspek ang iya coin purse apang ginatabunan ini sang bag sang suspek.
Ginbawi sang biktima ang coin purse kag masuwerte nga yara pa ang unod nga kuwarta, cards, kag importante nga mga resibo.
Ginapasalamatan naman sang biktima ang mga barker kag vendor nga nagbulig agud indi makapalagyo ang suspek tubtob magresponde ang kapulisan.
