Nakuhaan sa closed-circuit television camera footages ang brutal nga pagkulata kag pagbuno-buno sa isa ka babayi sang iya mismo nga live-in partner sa ila balay sa Don Carlos Bukidnon sadtong Sabado, Marso 11, 2023
Ginkilala ang biktima nga si Kemberly Achas, 3rd year college student sang Don Carlos Polytechnic College kag ang suspek amo si Elson Erap Jamisola, 27-anyos.
Takna las 3 sang hapon, makita sa CCTV footages nga ginkarga sang suspek ang siyam ka bulan nga anak kag ginbutang sa sofa kag pagkatapos sang pila ka minutos, nahulog ini.
Apang, padayon sa gihapon nga ginakastigo kag ginahampak sang pulungkuan ang biktima tubtob nga ginbuno-buno ini sang suspek gamit ang buka nga espiyo.
Nakaagom sang 16 tanan ka buno sa liog ang 22-anyos nga biktima.
Sa karon ginagamit sang kapulisan ang CCTV footages sa imbestigasyon kag suno sa ila, nagtinguha pa nga magpalagyo ang suspek apang gilayon ini nga nadakpan.
Gin-hostage sang suspek ang biktima kag ang ila anak rason nga hinali nga nagresponde ang mga kapulisan sa ginluntaran sang insidente.
Na-abtan pa sang mga kapulisan nga nagaginhawa ang biktima, apang kuntani temprano pa sila natawgan sang mga nakabati sa insidente.
Ginpaidalom na ang suspek sa drug test kag sandig sa impormasyon sang kapulisan, nagsulod na sadto si Jamisola sa rehab bangud sa paggamit sang iligal nga druga.
Yara naman sa maayo nga kahimtangan ang lapsag, sa idalom sang pagtatap sang mga ginikanan sang biktima.
Hustisya naman ang panawagan sang pamilya sang biktima samtang magapangatubang sa kaso nga parricide ang suspek.*
