[Hungod nga wala ginpangalanan ang imbolbado sa insidente bangud isa ka sensitibo ang balita].
Ginbawian sang kabuhi ang isa ka 12-anyos nga babayi matapos ini maghikog sa siudad sang Bacolod kahapon nga adlaw sang Miyerkules, Nobyembre 15, 2023.
Sa interview sang Radyo Bandera kay PCPT. Lelanie Lagoting, hepe sang Bacolod Police Station 1, natukiban na lamang sang iya mga utod ang wala na sang kabuhi ang Grade 7 student nga nagabitay sa balayan sang ila balay pasado las 2 sang hapon kahapon.
Suno kay Lagoting nga sandig sa panaysayon sang mga utod sang biktima, normal lamang ang giho sang ila utod sang ini ang magpauli halin sa eskwelahan kag naghampang pa ini sang computer pagkatapos nga magkaon sang panyaga.
Wala man ini makapanugid sa ila kun may ara ini sang ginadala nga mabug-at nga problema. Nahibaluan nga agut sa 9 ka mag ulutod ang biktima.
Dugang pa ni Lagoting nga sandig sa ila pagpangusisa, ginpalayag sang best friend sang biktima nga madugay na nga nagapanugid sa iya ang biktima nga mas maayo pa nga maghikog na lamang ini bangud masami nga naga-inaway ang iya mga utod nga nagaresulta sa pagmasakit sang ila iloy.
Wala nag-ekspektar ang iya best friend nga tumanon sang biktima ang iya nga plano bangud sa iya pagpati nagalahug lamang ini.
Problema sa pamilya ang nakita sang Police Station 10 nga kabangdanan sa pag-utas sang biktima sa iya nga kabuhi.
Nagapaalintun na lamang si Lagoting sa mga himata nga may mga kasubong sini nga sitwasyon nga i-monitor ang gihu sang ila mga kabataan kag kun mahimo nga regular nga paghinun-an ang mga ginikanan sa ila mga kabataan.
Plano karon sang Police Station 10 nga magapatigayon sang Symposium sa tagsa ka buluthoan sa ila area of Responsibility (AOR) agud mahatagan sang husto nga ihibalo ang mga kabataan kun paano i-handle ang mga problema.*
