Wala na ginapahanugutan ang pag-gwa sang mga taga Barangay Montilla sa ila barangay tubtob Mayo 10, sandig sa ginpagwa nga Executive Order No. 63, Series of 2021 ni Mayor Ella Celestina Garcia-Yulo sang Abril 26.
Ini matapos gin-rekomendar sang Municipal Inter-Agency Task Force (MIATF) nga i-lockdown ang barangay bangud sang kakulang sang kooperasyon sang mga primary contacts sang mga nagpositibo sa haya sang patay halin Abril 11 tubtob Abril 15, nga naghatag man sang kabudlayan sa contact tracing team nga makilala ang mga nagkinadto didto.
Ang Moises Padilla may yara na 48 ka residente nga nag positibo sa CoVid-19 sang Abril 26 kung sa diin ang 9 diri nag halin sa Barangay Montilla.
Suno sa mando sang alkalde, ang mga opisyales sang barangay ang kinahanglan ipasiguro nga ang tanan nga residente ang maga obserbar sang minimum health standards kag indi mag gwa sa ila barangay.
Ang Municipal Health Office, Disaster Risk Reduction and Management Office, Philippine National Police kag ang Philippine Army lamang ang pwede maka gwa kag sulod sa barangay kung indi sila mga residente diri.
Gina dumili-an naman ang mga indi taga Barangay Montilla nga mag sulod sa barangay kag indi pwede ka transaksyon sa mga taga Barangay Montilla tungod ang pagbaligya-anay kag baklanay ang himuon lang sa sulod sang barangay.
Mga prayer meeting, bible study kag mga parehas nga aktibidades ang pwede padayunon apang sa mga taga Barangay Montilla lamang, samtang ang bunyag, kasal kag lubong ang kinahanglanon may permiso halin sa alkalde kag sa health officer sang banwa.
Iga random swab testing naman ang mga residente diri sa 5 ukon 7 ka adlaw pagkatapos nga ma issue ang mando sang alkalde.
Ang magasupak sa mando, sarang magapangatubang sang kriminal kag administratibo nga kaso nga naka base sa laye sang pungsod.*
