BACOLOD CITY – Pagauboson sang IPM-CDC ang tanan nga basura sa siudad sang Bacolod nga wala makuha halin pa sang tinalikdan nga bulan sang Disyembre kag nalab-otan na sang bag-ong tuig.
Suno kay Ma. Fe Trespuentes, bag-o nga Officer-in-Charge sang Department of Public Services (DPS) Bacolod, dako ang pagtaas sa volume sang basura sa Bacolod sa nagligad nga bulan bangud sa mga selebrasyon, pagdagsa sang nga manugbakal, kag pagdamo sang mga baligya sa tatlo ka mayor nga mga merkado sa siudad.
Dugang pa ni Trespuentes, sang Disyembre 31, wala pa makuha ang mga basura sa pila ka mga barangay kag gintutukan ang Downtown Area kun diin nakakolekta sang 53,000 ka cubic meter sang basura.
Ginatumod bilang rason sa ulihi nga pagkuha sang mga basura ang malain nga panahon, pag-leave sang pila ka mga palero kag drayber sang Disyembre 31 tubtob Enero 1, kag paglain sang ila nga pamatyag tuga sang pagkambyo sang klima.
Nagapasalig ang DPS Bacolod nga pagadoblehon sang IPM ang ila puwersa agud malagas ang pagkolekta sa nabilin nga mga basura.
Ang IPM-CDC ang nagakolekta sang 1,700 tubtob 1,800 ka cubic meters sang basura kada adlaw sa Bacolod nga ginadul-ong sa Brgy. Felisa Sanitary Landfill.
Base naman sa pahayag ni Atty. Pacifico Maghari III, sang nagligad nga bulan pa sang Nobyembre 2022 nangin delayed ang pagkolekta ka IPM-CDC sang basura kinahanglan nila nga makatigayon sang 137 trips kada adlaw agud malagas ang ila backlogs.
Gapanawagan karon ang DPS sa publiko nga indi mag-hire sang traysikad ukon traysikol para sa iligal nga paghaboy sang basura sa bisan diin nga lugar sa Bacolod. Nakasaad sa Bacolod City Ordinance 531 ukon Anti-Littering Ordinance kag City Ordinance 596 ukon Ordinance Prohibiting the Indiscriminate Dumping and Throwing of Garbage and Other Kind of Waste nga magabayad sang multa ang magadakpan nga nagahaboy sang basura sa pampubliko nga lugar.
