Magapabilin ang border control operation sa area sang San Carlos City kasubong man sa siudad sang Kabankalan bisan pa ginhalugan na ang travel restrictions para sa mga pasahero.
Suno kay Governor Eugenio Jose Lacson, magluwas sa natukod nga kasugtanan ukon mutual agreement sa tunga sang San Carlos kag banwa sang Vallehermosa kag Kabankalan kag banwa sang Mabinay.
Ginakinahanglan gihapon sang mga pasahero gikan sa Region VII nalakip diri ang probinsya sang Cebu kag Negros Oriental nga magpakita sang negative RT-PCR result nga kuha sa sulod sang 72 hours sa ila pagpadulong sa probinsya sang Negros Occidental.
“Eventually it will be open. But coming from Region VII we will also RT-PCR not later than 72 hours after extraction,” siling sang gobernador.
Plano man sang provincial government nga maghinun-anun sa mga transport sector angut sa pagpatuman sang natukod nga executive order kag Resolution 101 nga ginpagwa sang National Inter-Agency Task Force.
Gindugang ni Lacson nga kabahin ini sang tikang batuk sa pagsaka sang Covid-19 cases karon nga ginkakas na ang pila ka mga requirements para sa mga nagabyahe nga pasahero.
Sandig sa Resolution 101, indi na kinahanglan pa sang mga pasahero nga magkuha sang travel authority pass kag medical certificate.
Ginsuportahan naman ini sang local government unit. Ugaling kasubong sang Provincial Government, nakasugtan sang mga LGU nga dapat magparehistro sa STAYSAFE.PH online application ang mga pasahero para makakuha sang approved travel coordination permit kag ginakinahanglan man ang negative RT-PCR test sa ila pagpauli ilabi na kun gikan sila sa mga lugar nga gwa sa nasakpansang Western Visayas ukon Region VI.
Ang provincial government ang magapadayon gihapon sa paghatag sang libre nga RT-PCR testing sa mga pasahero nga boluntaryo nga maga-pa swab test sa ila pag-abot sa seaport ukon sa airport.
“Our hands are tied really. But it’s a good thing that Resolution 101 allows us to request for a negative RT-PCR test prior to travel,” paathag pa sang gobernador.
with reports from Nico Delfin
