BACOLOD CITY – Ginpahayag ni PLTCOL. Mark Anthony Darroca, hepe sang Silay City Police Station nga isa ka lihitimo nga drug buy-bust operation ang ginpatigayon sang Station Drug Enforcement Team (SDET) sadtong Oktubre 30, 2022 sa Zone 5, Barangay Mambulac, Silay City, Negros Occidental.
Nagresulta ang operasyon sa pagkadakop sang isa ka High Value Individual nga ginkilala kay Jezrel Diaz.
Sa interview sang Radyo Bandera Bacolod kay Darroca, iya ginpahayag nga matapos nga mabaklan ang subject sang druga nga nagabalor sang P6,600 pinaagi sa isa ka police poseur-buyer, nagpakilala ini nga pulis kag nagdeklarar nga isa ini ka buy-bust.
Apang suno kay Darroca gulpi na lamang nga nagwaras ang subject kag ginbuyayaw ang mga operatiba kag naghublas.
Dugang pa ni Darroca sa kadugayon na sini sa serbisyo, kalabanan nga depensa sang mga nagkaladakpan amo nga sila ang ginaplantedan.
Apang suno pa kay Darroca madugay na nila nga gina-monitor ang mga giho ni Diaz kag positibo ini nga nagapakigbahin sa pagduso sang iligal nga druga kag ila nahibaluan nga miyembro ini sang isa ka dako nga sindikato nga naga operate sa bilog nga Negros Occidental.
Ginpahayag pa ni Darroca nga ang pagwaras sang subject kag pagkuha sang video sang iya mga himata ang isa lamang ka pamaagi agud makakuha sang simpatiya sa publiko.
Gina-manduan naman sang hepe ang mga himata sang akusado nga ipasaka na lamang sa korte ang ila reklamo bangud nakahanda naman ang mga kapulisan nga magsabat sa ila akusasyon.
Samtang, gindugang pa ni Darroca nga ginahulat na lang nila ang resulta sang “drug test” sa suspek agud mahibaluan kung naga-usar ini sang iligal nga druga.
Nahibaloan nga nakakuha ang suspek sang kabilogan nga 20 ka gramos sang ginasuspetsuhan shabu nga nagabalor sang kapin P136,000.*
