Ginkasubo sang mga board members sang Central Negros Electric Cooperative ukon CENECO ang pag-gisi sang mga miyembro sang Power Watch Negros sang kopya sang Memorandum of Understanding sa atubang sang media sa Negros Press Club, kahapon nga adlaw, Mayo 25, 2021.
Suno kay Attorney Danny Pondevilla, ila ginkasubo ang nangin reaksyon sang grupo ni Wennie Sancho, Secretary General sang Power Watch Negros Advocates Inc., sa wala madayon nga pagpirmahanay sang MOU.
Ginklaro ni Pondevilla nga wala ginkanselar sang CENECO board ang resolusyon nahanungod sa MOU sang Power Watch Negros.
Dugang pa sini, may mga gusto lang nga e-klaro ang mga miyembro sang board sang CENECO apang wala ini sang intensyun nga kanselahon ang resolusyon sa nasambit nga MOU.
Nagpahayag man si Pondevilla nga una na nga naghingyu sang suspensyon si Fr. Ernie Larida nahanungod sa MOU bangud sa pila ka mga klaripikasyon nga gusto sini mahibalu-an kaupod ang pila ka mga board members kag ang bag-o nga director nga gin-elect sang CENECO.
Nagapati man ini nga isa lang ang intensyun ni Sancho kag Father Larida kag ini ang kaayuhan sang tanan nga mga konsumidor.
Nagalaom naman si Pondevilla nga ila mapungkuan kag masolbar ang indi pag-intyendihanay sa tunga sang CENECO kag Power Watch Negros. Sa ulihi naghambal ini nga bukas sila sa gihapon nga mag-atubang sa mga miyembro sang Power Watch Negros agud maistoryahan ang nasambit nga MOU.*
