Ginsabat sang coach sang RGS World Marketing Corporation nga nahamtang sa Barangay Tangub, ciudad sang Bacolod ang mga pamangkot sang mga investors kun sa diin na ang kwarta nga ila gin-invest sa korporasyon matapos gin promisahan nga magin doble ukon triple ang ila nga kwarta matapos sang 45 diyas.
Suno sa kay Coach Maryjou Salunoy nga sa P1,000 nga iga invest sang ila ma-recruit, ila ini gina promisahan nga ini ang mangin 3,500 matapos sang masobra isa ka bulan kag iya gin turnover sa tag-iya sang RGS, nga iya man kupare nga si Rodolfo Saladra ang kapin saa 100Milyones ka pesos nga kwarta sang iya mga downline bilang coach sang team 4 sang RGS.
Suno pa sa iya nga indi ya naman makontak si Saladra sumugod sang nag-desisyon na ang mga investor nga i pull-out ang ila mga kwarta bangud ila na diskobrehan ang anomaliya sang korporasyon kag gin papana-ogan na sang cease and decease order sang Securities and Exchange Commission.
Gin kompirmar sini nga nag dangat na sa 1 ka bilyon ka pesos ang na tipon sang kompanya sa masobra 150mil ka mga miyembro sang RGS indi lang sa Negros Occidental kundi pati man sa pila ka lugar sa Western Visayas.
Malapit isa naman ka bulan karon nga nagatinir sa Bacolod ang negosyante nga si Myla Mendoza Team leader sang RGS sa probinsiya sang Capiz bangud luyag naman sini nga ipull-out ang sa kapin 50milyones ka pesos gikan man sa mga investors sa ila probinsiya.
Suno naman sa kay Mendoza nga indi siya makapa-uli sa ila lugar kaupod ang 6 niya ka kaupdanan nga nag invest man sa RGS bangud naga laum ini nga kuntani makuha pa nila ang ila kwarta.
Ginsiling man sini nga nakabaton na siya sang pagpamahog sa iya kabuhi kag naguba na ang ila palangabuhian bangud sa natabo sang ila gin saligan nga kompanya nga maka bulig kuntani sa ila nga maka bangon sa kapigaduhon.
si Salunoy kag si Mendoza kaupod ang pila pa ka mga team leader sang RGS ang nag padulong na sa Criminal Investigation and Detection Group-Negros Occidental agud magpasaka sang panumbungon batok sa ila ginatudlo nga amo ang naga kapyot sang ila kwarta nga si Saladra.
Sa maabot nga Abril 23 may yara pa sang schedule ang nasambit nga korporasyon nga ipang-uli ang kwarta sang pila ka mga investor apang sila ang nadulaan na sang paglaum matapos nga indi na makita kag indi naman macontact si Saladra, pati ang opisina sa Brgy. Tangub ang sarado na.
Pangabay sang grupo sa kay Saladra nga atubangon ang mga investors kag i-uli na sini ang mga kwarta bangud sila ang gina sukot na sang ila mga naganyat nga mag invest sa double your money scam.
Gin tingwaan naman sang Radyo Bandera Bacolod nga makuha ang bahin ni Saladra kag gin padulongan ang iya opisina apang ini ang sarado na.*
